Glórulaust að borga!

Tökum dæmi um þá Meðaljón og Sérajón.

Meðaljón átti 15 milljónir, hann tók aðrar 15 milljónir að láni og keypti 30 milljón króna húsnæði yfir fjölskylduna. Í dag getur hann ekki borgað af láninu sem er orðið 30 milljónir og ef hann væri svo heppinn að ná að selja húsið þá fengi hann 20 milljónir fyrir það.

Meðaljón vill borga upp lánið, er heppinn og selur húsið og leggur 20 milljónir inn hjá bankanum en skuldar enn 10 milljónir.

Við þetta bætist að hann keypti tveggja milljón króna bíl, svona meðalbíll fyrir fjölskylduna sem telur fimm manns, borgaði eina sjálfur og tók eina að láni.

Bílalánveitandinn tekur af honum bílinn því hann  getur ekki borgað og sendir honum allskonar bullreikninga fyrir hinu og þessu. Bíllinn er metinn á núll krónur upp í lánið sem er komið í tvær milljónir.

Meðaljón skuldar nú tvær milljónir í bílalán, en hefur engan bíl, skuldar 10 milljónir í húsnæði en hefur ekkert húsnæði og við bætist allskonar innheimtu og lögfræðikostnaður og dráttarvextir.

Meðaljón skuldar nú um það bil 15 milljónir. Er búinn að tapa 16 milljónum sem hann lagði fram og sér aldrei aftur í þessu lífi.

 

Sérajón átti hins vegar sitt húsnæði.

Hann skuldaði ekkert og átti 15 milljónir í banka.

Bankinn fór á hausinn og Sérajón tapaði öllum milljónunum 15.

Ríkisstjórnin ákveður hins vegar að bæta Sérajóni upp allt tapið með fé úr ríkissjóði.

Meðaljón skilur ekki réttlætið í því að endurgreiða Sérajóni úr ríkissjóði en ekki Meðaljóni sem setti sínar 15 milljónir í fasteign.

Meðaljón er reyndar búinn að sjá að hann mun aldrei meðan hann lifir geta borgað upp skuldir sínar. Hann veit innst í hjarta sínu að hann ber enga ábyrgð á því hvernig lán hans hafa hækkað takmarkalaust og allar forsendur sem hægt var að hugsa sér í upphafi eru löngu brostnar.

Lánveitandinn hækkar lánið og afborganir algerlega hömlulaust með slíku offorsi að hvaða mafía sem er myndi ekki láta sér detta það til hugar. Innheimtuaðferðirnar eru síðan slíkar að mafían dauðskammast sín fyrir linkind.

Þetta verja ráðherrar íslensku ríkisstjórnarinnar með öllum tiltækum ráðum.

Meðaljón sér að það er glórulaust að henda peningum í þessa hít, hættir að borga mafíunni og flýr land með fjölskylduna.

Grunnur að lausn á vanda heimila?

Athugasemdir

[Ingifríður Ragna Skúladóttir, 3.9.2009 kl. 12:49]

Frábærlega upp sett hjá þér.  Nákvæmlega það sem ég sagt vildi hafa.

[Rúnar (IP-tala skráð) 3.9.2009 kl. 13:15]

Góður punktur en þessi Sérajón er nefnilega ættingi ráðastéttar ;/

[Guðmundur Bjarki Halldórsson (IP-tala skráð) 3.9.2009 kl. 15:34]

Frábær pistill og gott innlegg í þjóðfélagsumræðuna.

[Friðrik Ásmundsson (IP-tala skráð) 3.9.2009 kl. 16:41]

Frábær pistill, Þetta er nákvæmlega það sem er að gerast í dag!

[Kjartan Sigurgeirsson, 3.9.2009 kl. 20:21]

Þetta er rétt Baldvin. það er komið að því að ég sé ekki jafn mikið eftir nokkurri krónu sem sviðin hefur verið af lágum launum mínum í skatta í gegn um árin og þeim sem farið hafa í að mennta "menn" eins og þennan Þórólf, nema þá þeim sem farið hafa í menntun Gylfa "viðskiptaráðherra", þeir virðast ekki hafa verið að fylgjast með í tímum. Þeirra stefna er þráðbeint í alkul.  Þeir virðast ekki gera sér grein fyrir að þessi leiðrétting á skuldastöðu heimilanna dreifist á líklega eitthvað nærri 30 árum, því stærstur hluti skuldanna er tilkominn á síðustu 5 til 10 árum og er sennilega að mestum hluta til 40 ára.